生果金同長生津有咩分別？揀邊個好
一個唔使審查、一個每月多 $2,670 仲有免費醫療。兩樣只可以揀一樣，揀之前要計清楚。
生果金同長生津都係社署公共福利金計劃下嘅津貼，但對象、金額同條件都唔同，而且唔可以同時領取。好多長者一直領緊生果金，其實已經符合長生津資格，每月少收咗二千幾蚊。
三個重點
- 生果金：70 歲或以上、毋須經濟審查，每月 $1,675。
- 長生津：65 歲或以上、要過入息及資產審查，每月 $4,345，75 歲起仲有公營醫療費用豁免。
- 兩者只能揀一；符合長生津限額嘅話，長生津幾乎一定較著數。
一、一表比較
| 高齡津貼（生果金） | 長者生活津貼（長生津） | |
|---|---|---|
| 年齡 | 70 歲或以上 | 65 歲或以上 |
| 每月金額（2026 年 2 月起） | $1,675 | $4,345 |
| 經濟審查 | 毋須 | 要過入息及資產兩道閘 |
| 居港規定 | 居港最少七年，申請前連續居港最少一年（離港不超過 90 日），領款期間繼續喺香港居住 | |
| 75 歲或以上醫療費用豁免 | 冇 | 有 |
| 社區牙科支援計劃 | 不適用 | 適用 |
| 廣東計劃／福建計劃 | 兩者都可以喺廣東或福建領取 | |
二、差額有幾大
每月相差 $2,670，一年相差 $32,040。75 歲之後，長生津受惠人睇公立醫院、急症同專科都豁免收費，對經常覆診嘅長者，價值可能比津貼本身更高。
三、點揀
- 入息同資產都喺限額內：揀長生津。
- 超出限額、已滿 70 歲：先領生果金，唔使等。之後如果合法重新安排資產而符合限額，可以再申請轉長生津。
- 超出限額、65 至 69 歲：呢段時間兩樣都未必有。如果想領長生津，就要喺遞表前處理好資產同入息結構。
四、點樣轉
- 由生果金轉長生津：如果入息及資產已符合長生津限額，可以透過電話、傳真、電郵或郵遞申請轉領，並索取「長者生活津貼簡易表格」。
- 長生津停發之後：如果覆檢時超出限額而停發，年滿 70 歲嘅話，社署會安排改領毋須申報經濟狀況嘅生果金。
- 夫婦：一人超限，兩人都唔合資格領長生津；但年滿 70 歲嘅一方仍然可以領生果金。
五、轉長生津之前要準備
由生果金轉長生津，社署會核對入息同資產，包括同入境處、土地註冊處、香港年金公司等核對資料。轉之前最好先計清楚兩道閘，避免批核後覆檢時超限，要退還多領嘅款項。
想知自己嘅情況點部署？可以睇睇 Silverlink 嘅長生津規劃服務，或者 WhatsApp 我們初步查詢。
資料來源：社會福利署長者生活津貼專頁及公共福利金計劃各類津貼金額（2026 年 2 月 1 日起生效）。一切以社署最新公布及審批結果為準。本文只供一般參考。
常見問題
生果金同長生津可唔可以一齊領？
不可以。公共福利金計劃下只能揀一項津貼，亦不能同時領取綜援。
領緊生果金，點樣轉長生津？
如入息及資產符合長生津限額，可透過電話、傳真、電郵或郵遞向所屬社會保障辦事處申請轉領，並索取「長者生活津貼簡易表格」。
長生津停咗，會唔會自動轉生果金？
如因覆檢時超出限額而停發，年滿 70 歲的話，社署會安排改領毋須申報經濟狀況的高齡津貼。
